聖方濟各大學校牧室 × 教區全人發展委員會 × 在山田海
2024年3月聖方濟各大學廿幾個同學參加咗一連串活動，由紀錄片電影《The Letter 寫給我地的家書》出發了解全球環境生態危機，到學習野外無痕( #leavenotrace)原則，最後仲參與淨灘，即刻實踐所學。
《The Letter 寫給我地的家書》紀錄片喺2022年推出，由教宗方濟各《願祢受讚頌》（#LaudatoSi）通諭做基礎，講述教宗寫信畀五位受氣候變化影響嘅兄弟姐妹，邀請佢哋前往梵蒂岡相聚連結分享自己嘅生命故事。觀賞電影後，教區全人發展委員會幹事分享番氣候變化對香港嘅威脅，講講環境問題對不同群體嘅影響，探討生態公義嘅問題。
喺之後嘅野外無痕( #leavenotrace)工作坊，在山田海 Here in Nature嘅代表就介紹咗7大原則，等同學明白到關心環境可以由微小嘅行動開始，有意識地改變自己嘅習慣，而唔係為咗方便而不顧大自然嘅未來。
了解到塑膠對海洋生態嘅威脅後，我們一行差唔多30人即刻就搭車由大學出發去咗西貢龍蝦灣淨灘，親身感受香港嘅環境威脅。短短嘅時間已經執到31公斤垃圾，當中千奇百趣乜都有，以膠水樽及膠水樽樽蓋最多。喺之後分享嘅環節，同學、工作人員同 Chaplaincy, SFU & CBCC, Hong Kong校牧杜神父都真誠分享感受：表面好似好乾淨嘅沙灘原來暗藏唔少垃圾、諗到沒完沒了嘅垃圾污染嘅無力感、一個人嘅改變也可以感染更多人一起帶動改變⋯⋯
好似杜神父咁講，呢個只喺一個開始，未來我哋會繼續一齊努力守護地球 – 我哋嘅共同家園！
